Татьяна Борисова тата Сергей Угарин авӑн уйӑхӗн 12-мӗшӗнче ҫемье ҫавӑрнӑ. Уяв ЧР Элтеперне суйламалли кунпа пӗр килнӗрен вӗсем сасӑлава кайма та манман.
Татьянӑпа Сергей Ҫӗнӗ Шупашкарти ЗАГСра ҫырӑннӑ. Кун хыҫҫӑнах ҫамрӑк мӑшӑр суйлав участокне ҫул тытнӑ.
Паллах, Татьяна суйлава шурӑ кӗпепе ҫитнӗ, Сергей – костюмпа. Ҫамрӑксем суйлава хутшӑнасси вӗсен тивӗҫӗ пулнине палӑртнӑ.
Паян, авӑн уйӑхӗн 10-мӗшӗнче, Чӑваш Ен сывлӑх сыхлав министрӗ Владимир Степанов Республикӑн психиатри пульницин коллективне ҫӗнӗ ертӳҫӗпе паллаштарнӑ. Тилхепене Владимир Дубова шаннӑ. Вӑл маларах сывлӑх сыхлав министрӗн ҫумӗ пулса тӑрӑшнӑччӗ.
Владимир Дубов 1999 ҫулта Чӑваш патшалӑх университечӗн медицина факультетӗнчен вӗренсе тухнӑ. Унтан асӑннӑ аслӑ шкулӑн ординатуринче ӑс пухнӑ. РФ Халӑх хуҫалӑхӗн академийӗнче сывлӑх сыхлас ӗҫри менеджмент енӗпе вӗреннӗ. 2017 ҫулта Шупашкарти коопераци институтӗнче экономика магистрӗн степеньне илнӗ.
2008-2014 ҫулсенче Владимир Дубов Шупашкарти 1-мӗш клиника пульницин тӗп врачӗн ҫумӗ, 2014-2017 ҫулсенче Шупашкар районӗн тӗп врачӗнче, кайран Ҫӗнӗ Шупашкарти хула пульницинче тӗп врачра ӗҫленӗ. Кайран республикӑн Сывлӑх сыхлав министерствинче пай пуҫлӑхӗнче тӑрӑшнӑ, 2018 ҫулти утӑ уйӑхӗнче ӑна министр ҫумӗ пулма шаннӑ.
Ҫӗнӗ Шупашкарти 19-мӗш шкулта икӗ ача кӑшӑлвируспа чирленӗ. Вӗсем ҫемйипе Турцире каннӑ, унтан килсен анализ панӑ, анчах кӑтартӑвне кӗтсе илмен – ҫаплипех шкула ҫӳренӗ. Юлашки хутчен вӗсем унта авӑнӑн 3-мӗшӗнче пулнӑ.
Анализ кӑтартӑвӗ халӗ паллӑ ав – ачасен кӑшӑлвирус пур. Вӗсем класри тантӑшӗсемпе хутшӑннӑ. 19-мӗш шкулти 3-мӗш «Б» класа (унта 27 ача вӗренет) тата 9-мӗш «Б» класа (унта 20 ача ӑс пухать) хупма тивнӗ. Ачасене изоляци тунӑ, вӗсем дистанци мелӗпе вӗренеҫҫӗ. Кунсӑр пуҫне вӗсене тухтӑрсем пӑхса тӑраҫҫӗ. Шкулта вара дезинфекци тунӑ.
Авӑнӑн 8-мӗшӗнче Сосновкӑри 10 ҫулти ача чирленине палӑртнӑ. Вӑл инфекциленнӗ тӑванӗсемпе хутшӑннӑ.
Ҫӗнӗ Шупашкарти 12-мӗш шкулта вырӑс чӗлхипе литературине вӗрентекен Татьяна Якунина Раҫҫей президенчӗн патшалӑх премине тивӗҫнӗ. Хушӑва ҫурла уйӑхӗн 21-мӗшӗнче Владимир Путин алӑ пуснӑ.
Ҫак премие вӗрентӳре пысӑк ҫитӗнӳсем тунӑ педагогсене параҫҫӗ. Татьяна Якунина та Раҫҫейри чи лайӑх вӗрентекенсен йышне кӗнӗ.
Татьяна Якунина И.Я.Яковлев ячӗллӗ ЧППУран лайӑх вӗренсе тухнӑ, Ҫӗнӗ Шупашкарти 12-мӗш шкулта 2001 ҫултанпа ӗҫлет. Унӑн пысӑк квалификаци категорийӗ пур, шкулта 18 ҫул педагогра ӗҫлет.
Шупашкарта пӗр талӑкра икӗ ҫыннӑн велосипедне вӑрланӑ.
38 ҫулти хӗрарӑм тин ҫеҫ туяннӑ велосипед ҫухални пирки йӗрке хуралҫисене пӗлтернӗ. 17 пин тенкӗ ытла тӑракан хатӗр ҫӗрле ҫухалнӑ. Хӗрарӑм ӑна нумай хваттерлӗ ҫуртӑн коридорӗнче хӑварнӑ. Велоҫӑрапа тыттарни те пулӑшман.
Ҫавӑн пек пӑтӑрмах 36 ҫулти хӗрарӑмпа та пулса иртнӗ. Велосипеда вӑл подъездри стена ҫумне таянтарса хӑварнӑ. Кӑштахран коридора тухсан велосипед ҫуккине асӑрханӑ.
Ҫӗнӗ Шупашкарта вара 58 ҫулти арҫын велосипеда урамра, нумай хваттерлӗ ҫурт подъезчӗ умне, тӑратса хӑварнӑ. Кӑнтӑрла никам та тӗкӗнмӗ тесе шаннӑ-ши?
Ҫӗнӗ Шупашкарта пурӑнакан Анастасия Варламова авӑн уйӑхӗн 3-мӗшӗнче 17 сехет ҫурӑра килтен тухса кайнӑ та таврӑнман. Вӑл – 36 ҫулта. Аппӑшӗ пӗлтернӗ тӑрӑх, вӑл унччен нумайлӑха тухса кайман.
Тӑванӗсем ун патне шӑнкӑравлаҫҫӗ, анчах телефонӗ сӳннӗ. Настьӑна тухтӑр пулӑшӑвӗ кирлӗ. Тӑванӗсем ӑна малтан хӑйсем шыранӑ, Настя ҫӳренӗ кафесене кӗнӗ. Пульницӑсемпе моргсене те тӗрӗсленӗ.
Тусӗсем те Настя ӑҫтине пӗлмеҫҫӗ. Унӑн сулахай хулӗ ҫинче чӗрепе кинжал ӳкернӗ татурировка пур. Хӑй вӑл 175 сантиметр ҫӳллӗш, ҫӳҫӗ ҫырӑ, куҫӗ хӑмӑр. Килтен кайнӑ чухне тӗттӗм хура костюм, сӑрӑ футболка, кроссовка тӑхӑннӑ пулнӑ. Ӑна курсан полицие пӗлтерӗр.
Авӑн уйӑхӗн 5-мӗшӗнче Ҫӗнӗ Шупашкарта общежити ҫуннӑ. Пушар тухсан ҫуртри электричествӑна чарса лартнӑ.
Ӗнер каҫхине, 20 сехетре, Терешкова урамӗнчи 17-мӗш ҫуртра пушар тухнӑ. Ку – общежити. Ҫулӑм виҫҫӗмӗш хутри пӗр пӳлӗмре тухнӑ. Электричествӑна чарса лартнӑ, ҫынсене урама илсе тухнӑ.
Вырӑна виҫӗ пушар машини, васкавлӑ медпулӑшу килнӗ. Юрать-ха, общежитире пурӑнакансенчен нихӑшӗ те суранланман, шар курман. Халӗ пушар мӗншӗн тухнине тӗпчеҫҫӗ.
Кӑҫал та Андриян Николаевӑн космонавт ҫуралнӑ кунне халалласа «Спица ҫинчи хӗвел» велочупу иртет. Йӑлана кӗнӗ тӑрӑх, ӑна авӑн уйӑхӗн 5-мӗшӗнче йӗркелеҫҫӗ.
Старт – Шупашкартан тата Ҫӗнӗ Шупашкартан. Шуршӑл хыҫҫӑн спортсмеснем Сӗнтӗрвӑррине кайӗҫ, унта тепӗр велочупу иртет.
Шупашкартан 8 сехет ҫурӑра Николаев палӑкӗ умӗнче старт пулӗ. Ҫӗнӗ Шупашкартан «Химик» культура ҫурчӗ умӗнчен 9 сехетре тапранӗҫ.
Шуршӑлта велочупуҫӑсем Андриян Николаевӑн вилтӑпри ҫине чечек хурӗҫ, унтан Сӗнтӗрвӑррине кайӗҫ. Унта 12 сехет те 15 минутра «Мариинский» велочупу иртет. Юлашкинчен ача-пӑча паркне савӑнӑҫлӑ лару-тӑрура уҫӗҫ.
Ҫӗнӗ Шупашкарта пурӑнакан хӗрарӑм ҫывӑрма каятӑп тенӗ те… ҫухалнӑ. Тӑванӗсем вӑл ӑҫтине пӗлмеҫҫӗ.
Ҫурла уйӑхӗн 29-мӗшӗнче 53 ҫулти Светлана Михайлова, Коммунистсен урамӗнчи 31-мӗш ҫуртра пурӑнаканскер, каҫхине килте хӗрӗпе, мӑнукӗпе пулнӑ. Хӗрарӑм ҫывӑрма каятӑп тесе пӳлӗме кӗнӗ. Вӑл чӑнах та хӑйӗн патӗнче телевизор пӑхнӑ.
Ирхине хӗрӗпе мӑнукӗ вӑраннӑ – тӑванӗ пӳлӗмре ҫук, телевизор кӑна ӗҫлесе ларнӑ. Унччен амӑшӗ кун пек килтен тухса кайман, киле пӗр кун ҫеҫ килменни пулкаланӑ. Тӑванӗсем ун патне шӑнкӑравласа ҫитеймеҫҫӗ, вӑл ӑҫтине пӗлмеҫҫӗ.
Ҫӗнӗ Шупашкарти ача пахчин заведующийӗ хӑйӗн амӑшне ӗҫе илнӗ. Хут ҫинче. Тӗрӗссипе вара хӗрарӑм унта ӗҫлемен. Заведующи тӗлӗшпе РФ Пуҫиле кодексӗн 159-мӗш статйин 3-мӗш пайӗпе пуҫиле ӗҫ пуҫарнӑ. Ку статьяпа ӗҫ вырӑнӗпе усӑ куракансене айӑплаҫҫӗ.
Тӗпчевҫӗсем шухӑшланӑ тӑрӑх, хӗрарӑм 2019 ҫулхи утӑ уйӑхӗнче хӑйӗн амӑшне кӗҫӗн воспитатель (ансатрах каласан, няня) евӗр ӗҫе илнӗ. Ҫавӑн хыҫҫӑн ӑна 39 пин тенкӗ ытларах тӳленӗ. Ҫав укҫана заведующи хӑй кӗсйине чикнӗ, унпа хӑй пӗлнӗ пек усӑ курнӑ.
Ача пахчинчи мӗнпур хута тӗпчевҫӗсем тишкереҫҫӗ, кӳнтеленсенчен ыйтса пӗлеҫҫӗ. Пуҫиле ӗҫе малалла тишкереҫҫӗ.
+12.3 °C